Connect with us

Entertainment

អ្នកស្រី Frida Kahlo និមិត្តរូប​តំណាង​ឱ្យ​ស្ត្រី​ការពារ​ស្ត្រី​

​កើត​នៅ​ឆ្នាំ ១៩០៧ ប្រទេស​ម៉ិក​ស៊ិក អ្នកស្រី Magdalena Carmen Frieda Kahlo y Calderón ទទួលបាន​ភាពល្បីល្បាញ​តាមរយៈ​គំនូរ​

​កើត​នៅ​ឆ្នាំ ១៩០៧ ប្រទេស​ម៉ិក​ស៊ិក អ្នកស្រី Magdalena Carmen Frieda Kahlo y Calderón ទទួលបាន​ភាពល្បីល្បាញ​តាមរយៈ​គំនូរ​ពាក់កណ្តាល​ខ្លួន​របស់​អ្នកស្រី ជាមួយ​សំពត់​ដ៏​វែង សម្លៀក​បំពាក់​ដែល​មាន​ពណ៌​ចម្រុះ​លេច និង​ចិញ្ចើម​ដែល​មាន​ទម្រង់​ប្លែក​ពី​អ្នកផង​។ ថ្ងៃ​នេះ​អ្នកស្រី​ត្រូវបាន​គេ​ចាត់ទុក​ជា​និមិត្តរូប​តំណាងឱ្យ​ស្ត្រី​ការពារ​ស្ត្រី និង​ជា​ស្ត្រី​ដ៏​ល្បីល្បាញ​ម្នាក់​ក្នុង​វិស័យ​គំនូរ​។ អ្នកស្រី​មិន​ត្រឹមតែ​មាន​ទេពកោសល្យ​គូរគំនូរ​ដែលមាន​ស្តា​យល៍​ប្លែក​នោះទេ តែ​ដំណើរ​ជីវិត​របស់​អ្នកស្រី​ក៏​មាន​ភាពរស់រវើក​គួរឱ្យ​ភ្ញាក់ផ្អើល​ផង​ដែរ​។
​កាល​ពី​តូច​អ្នកស្រី Frida មាន​ជំងឺ​ខួរឆ្អឹងខ្នង​ប៉ូ​លី​យ៉ូ​ជាហេតុ​ធ្វើឱ្យ​ជើង​ម្ខាង​របស់​អ្នកស្រី​តូច​ជាង​ជើង​ម្ខាង​ទៀត ដោយសារ​តែ​បែប​នេះ​ទើប​អ្នកស្រី​ស្លៀកសំពត់​វែង​ដើម្បី​បិទបាំង​ជើង​របស់​ខ្លួន​។ ធំ​ចម្រើន​វ័យ​ឡើង​ក្នុងអំឡុងពេល​ដែល​ប្រទេស​ម៉ិក​ស៊ិក​ធ្វើ​បដិវត្តន៍ អ្នកស្រី Frida តែងតែ​មើល​ឃើញ​នូវ​អំពើហិង្សា និង​ការផ្ទុះអាវុធ​ជា​ញឹកញយ​។ ក្រោយ​មក​អ្នកស្រី Frida បាន​អះអាង​ថា​អ្នកស្រី​គឺ​កើត​នៅ​ឆ្នាំ ១៩១០ ជា​ឆ្នាំ​បដិវត្តន៍ ដើម្បី​ខ្លួន​មានឱកាស​អាច​ចូលរួម​ដោយ​ផ្ទាល់​ក្នុង​បដិវត្តន៍​នេះ​។


​បន្ទាប់​ពី​បញ្ចប់​ការសិក្សា អ្នកស្រី Frida មាន​គម្រោង​សិក្សា​ផ្នែក​វិជ្ជាពេទ្យ ក៏​ប៉ុន្តែ​ពេល​ធ្វើដំណើរ​តាម​ឡានក្រុង អ្នកស្រី​ក៏​ជួប​គ្រោះថ្នាក់​ចរាចរណ៍​ធ្វើឱ្យ​បាក់​ឆ្អឹងខ្នង និង​ឆ្អឺងត្រគាក​របស់អ្នក​ស្រី​។ នៅ​ឆ្នាំ​បន្ទាប់​ពេលដែល​បាន​ធូរស្បើយ អ្នកស្រី​ក៏​ចាប់ផ្តើម​គូរគំនូរ​ពាក់កណ្តាល​ខ្លួន​របស់​អ្នកស្រី​ជា​លើកទីមួយ​។​
​នៅ​អំឡុង​ពេល​ជាសះស្បើយ អ្នកស្រី Frida ក៏​បាន​ចាប់ផ្តើម​គូរគំនូរ​ពេញ​ម៉ោង​តែម្តង និង​បាន​ចូលរួម​ជាមួយ​សម្ព័ន្ធ​យុវជន​កុំម្មុយនីស្ត និង​គណបក្ស​កុំម្មុយនីស្ត​ម៉ិក​ស៊ិក​។ អ្នកស្រី​បាន​ជួប​លោក Diego Rivera ដែល​ជា​វិចិត្រករ​ដូច​គ្នា​នៅ​កម្មវិធី​មួយ​របស់​គណបក្ស​កុំម្មុយនីស្ត​។ ថ្វី​បើ​លោក​មាន​អាយុ​ច្រើនជាង​អ្នកស្រី​ដល់​ទៅ ២០ ឆ្នាំ និង​មាន​ប្រពន្ធ​មិន​បាន​រៀបការ​ពីរ​នាក់​ក្តីក៏ លោក Diego Rivera ហើយ​និង​អ្នកស្រី​ក៏​បាន​រៀប​អាពាហ៍ពិពាហ៍​។ អ្នកស្រី Frida បាន​រៀបរាប់​ពី​កាយសម្ព័ន្ធ​រវាង​អ្នក​ទាំងពីរ​ថា​ជា​“​អាពាហ៍ពិពាហ៍​រវាង​សត្វ​ដំរី និង​សត្វ​ព្រាប​”​។ ក៏ប៉ុន្តែ គេ​បាន​យល់ព្រម​ពី​សម្ព័ន្ធ​នេះ​ដោយសារ​តែ​លោក Diego គឺជា​វិចិត្រករ​អាជីព​នឹង​ត្រូវ​ទទួលខុសត្រូវ​លើ​ការចំណាយ​ថ្លៃ​ព្យាបាល​របស់​អ្នកស្រី Frida​។​


​អ្នកស្រី Frida បាន​ផ្លាស់​ទៅ​រស់នៅ​ឯ​ទីក្រុង Cuernavaca ដោយសារតែ​លោក Diego ត្រូវបាន​គេ​ប្រគល់​ការងារ​ឱ្យទៅ​គូរគំនូ​រលើ​ជញ្ជាំង​នៅ​តំបន់​នោះ​។ នៅ​ទីនោះ​អ្នកស្រី​ក៏​បាន​ចាប់ផ្តើម​គូរគំនូរ​ដោយ​ទទួល​បាន​ការ​បំផុសគំនិត​ពី​សិល្បៈ​គំនូរ​បុរាណ​របស់​ម៉ិក​ស៊ិក​។ នៅ​ទី​នេះ​ហើយ​ដែល​អ្នកស្រី​បាន​ផ្តាច់ខ្លួន​ពី​ឥទ្ធិពល​អឺរ៉ុប​។ អ្នកស្រី​ចាប់ផ្តើម​ស្លៀក​សម្លៀកបំពាក់​ប្រពៃណី​ម៉ិចស៊ិក និង​ក្រង​សក់​ជាមួយ​បូ និង​ផ្កា​ដើម្បី​បង្ហាញ​ពី​វប្បធម៌​ដើម​នៃ​អ្នកស្រុក​របស់​អ្នកស្រី​។​
​ជីវិត​អាពាហ៍ពិពាហ៍​រវាង​អ្នកស្រី Frida និង​លោក Diego គឺ​មាន​ភាពច្របូកច្របល់​ខ្លាំង​។ អ្នក​ទាំង​ពីរ​គឺ​សុទ្ធតែ​មាន​តម្រេក និង​ឆេវឆាវ​ខ្លាំង​។ ហើយ​អ្នក​ទាំង​ពីរ​សុទ្ធតែ​មាន​ស្នេហា​លួចលាក់​រៀងៗ​ខ្លួន​។ អ្នកស្រី Frida គឺជា​មនុស្ស​ដែល​ស្រលាញ់​ស្រី​ផង និង​ប្រុស​ផង ចំណែក​លោក Diego គឺ​អាច​អត់ធ្មត់​បាន​នៅពេលដែល Frida មាន​ស្រី​កំណាន់​ខាងក្រៅ តែ​អ្វី​ដែល​លោក​ប្រចណ្ឌ​ខ្លាំង​គឺ​នៅពេលដែល Frida មាន​គូ​កំណាន់​ជា​បុរស​។ ក្រោយពី​បាន​ដឹងថា​លោក Diego ស្រលាញ់​គ្នា​លួចលាក់​ជាមួយ​ប្អូនស្រី​របស់​ខ្លួន អ្នកស្រី Frida មិន​អាច​លើកលែង​បាន​ក៏​សម្រេច​លែងលះ​ជាមួយ​លោក Diego ប៉ុន្តែ​ក្រោយមក​ក៏​បាន​រៀបការ​ជាមួយគ្នា​ជា​ថ្មី​ម្តងទៀត​។ ពួកគេ​ទាំង​ពីរ​នៅតែ​ប្រកាន់ខ្ជាប់​ជា​អ្នក​កាន់​លទ្ធិ​កុំម្មុយនីស្ត​ពេញ​មួយ​ជីវិត​របស់​ពួកគេ​។ ក្រោយ​ពី​រាប់អាន​គ្នា​ជាមួយ​លោក Leon Trotsky អ្នកស្រី Frida ក៏​បាន​ស្រលាញ់គ្នា​លួចលាក់​ជា​មួយ​លោក Leon​។ ព័ត៌មាន​លោក Trotsky ត្រូវបាន​គេ​ធ្វើឃាត​នៅ​ទីក្រុង Cuernavaca ប្រទេស​ម៉ិក​ស៊ិ​កមាន​ភា​ពល្បី​រន្ទឺ​យ៉ាងខ្លាំង​។
​ហេតុការណ៍​ដែល​កើតឡើង​លើ​អ្នកស្រី​កាលពី​ក្មេង​ស្ថិតនៅ​ជាប់​ជាមួយ​អ្នកស្រី​រហូត​។ ពេញ​មួយ​ជីវិត​របស់​អ្នកស្រី អ្នកស្រី​បាន​ធ្វើ​ការវះកាត់​ចំនួន ៣៥ ដង និង​តែងតែ​ឈឺចាប់​គ្រប់ពេល​នៃ​ជីវិត​ពេញវ័យ​របស់​អ្នកស្រី​។ ក្នុង​រយៈពេល ១៥ ឆ្នាំ​ចុងក្រោយ​នៃ​ជីវិត​របស់​អ្នកស្រី សុខភាព​របស់​អ្នកស្រី​ក៏​បាន​ធ្លាក់​ដុនដាប​ចុះ​។ នៅ​ឆ្នាំ ១៩៥០ អ្នកស្រី​ក៏​ត្រូវបាន​បញ្ជូន​ទៅ​មន្ទីរពេទ្យ​ដោយសារតែ​ដំបៅ​រលួយ​។ អ្នកស្រី​បាន​ចំណាយពេល ៩ ខែ​សម្រាក​ព្យាបាល​នៅ​មន្ទីរពេទ្យ តែ​អ្នកស្រី​នៅតែ​បន្ត​គូរ​គំនូរ និង​ចូលរួម​ក្នុង​នយោបាយ​ដដែល​។ ស្នាដៃ​គំនូរ​របស់​អ្នកស្រី​នាពេលនោះ​គឺ​ឆ្លុះបញ្ចាំង​ពី​ភាពឈឺចាប់​នៃ​ជំងឺ​របស់​អ្នកស្រី​។ តែ​គួរ​ឱ្យ​សោកស្តាយ​ក្រោយ​មក​ជើងរ​បស់​អ្នកស្រី​មួយ​នោះ​ក៏​ត្រូវបាន​គេ​កាត់ចោល​។


​ដោយ​កើតទុក្ខ​ពេក អ្នកស្រី​ក៏​បាន​ប្រើប្រាស់​ស្រា និង​ថ្នាំ​បំបាត់​ការឈឺចាប់​ធ្វើជា​ឧបករណ៍​បំបាត់ទុក្ខ​។ ដោយសារតែ​ខ្លាច​អ្នកស្រី​រស់​មិន​បាន​យូរ ជាង​ថតរូប​ជនជាតិ​ម៉ិក​ស៊ិ​កលោក Lola Alvarez Bravo បាន​ធ្វើ​ការតាំងពិព័រណ៍​គំនូរ​ទោល​លើក​ទី​មួយ​របស់​អ្នកស្រី​។ គ្រូពេទ្យ​បាន​ហាមឃាត់​មិនឱ្យ​អ្នកស្រី​ងើប​ពី​គ្រែ​ឡើយ ប៉ុន្តែ​អ្នកស្រី​បាន​ធ្វើឱ្យ​គ្រប់​គ្នា​ភ្ញាក់ផ្អើល​ដោយ​បង្ហាញខ្លួន​ពេល​បើក​ការតាំងពិព័រណ៍​នៅក្នុង​ឡានពេទ្យ និង​ត្រូវបាន​គេ​សែង​ដោយ​គ្រែ​សែង​អ្នកជំងឺ​។​
​នៅ​ឆ្នាំ ១៩៥៤ អ្នកស្រី​បាន​សរសេរ​នៅក្នុង​សៀវភៅ​កំណត់ហេតុ​ពី​គោលបំណង​ចង់​សម្លាប់ខ្លួន​។ អ្នកស្រី​បាន​ស្លាប់​នៅ​ឆ្នាំ​ដដែល​នោះ​ក្នុង​វ័យ ៤៧ ឆ្នាំ ហើយ​មូលហេតុ​ស្លាប់​គឺ​ដោយសារ​ស្ទះ​សរសៃឈាម​សួត ក៏​ប៉ុន្តែ​គេ​សង្ស័យ​ថា​ការស្លាប់​នេះ​គឺ​ដោយសារ​ការ​សម្លាប់ខ្លួន​។​

​អ្នកស្រី​ទ​ទូល​បាន​ភាពល្បីល្បាញ​តាមរយៈ​គំនូរ​ពាក់កណ្តាល​ខ្លួន​របស់​អ្នកស្រី​ដែល​គំនូរ​នេះ​រៀបរាប់​ពី​របួស​ផ្លូវកាយ និង​ផ្លូវចិត្ត​របស់​អ្នកស្រី​។ អ្នកស្រី និង​លោក Diego គឺ​ពុំ​មាន​កូន​ឡើយ​បើ​ទោះជា​ខំប្រឹង​ព្យាយាម​ក៏ដោយ ហើយ​ស្នាដៃ​ភាគច្រើន​របស់​អ្នកស្រី​គឺ​ផ្តោត​ទៅលើ​ភាព​អសមត្ថភាព​របស់​អ្នកស្រី​ក្នុងការ​មានកូន​។ ថ្វី​បើ​អ្នកស្រី​ទទួលបាន​ភាពល្បីល្បាញ​តាមរយៈ​គំនូរ​រូប​ខ្លួន​ឯង ក៏​ប៉ុន្តែ​ក្នុង​ចំណោម​ស្នាដៃ​គំនូរ ១៤៣ ផ្ទាំង​របស់​អ្នកស្រី គឺមាន​តែ ៥៥ ផ្ទាំង​ប៉ុណ្ណោះ​ដែល​ជា​គំនូរ​រូប​ខ្លួន​ឯង​របស់​អ្នកស្រី​។
​ប្រទេស​ម៉ិក​ស៊ិក​បាន​ប្រកាស​ដាក់​ស្នាដៃ​គំ​នូ​ររបស់​អ្នកស្រី Frida Kahlo ជា​បេតិកភណ្ឌ​ជាតិ ហើយ​គំនូរ​របស់​អ្នកស្រី​មិន​ត្រូវបាន​អនុញ្ញាត​ឱ្យមាន​ការនាំ​ចេញ​ទៅ​ក្រៅប្រទេស​ឡើយ​។ ស្នាដៃ​គំនូរ​របស់​អ្នកស្រី​ដែល​មានឈ្មោះ​ថា Roots ត្រូវបាន​គេ​ដាក់​ដេញថ្លៃ​ដោយ​ជាប់​ឈ្មោះ​ជា​គំនូរ​ដែល​មាន​តម្លៃ​ខ្ពស់​ជាងគេ​ក្នុង​ចំណោម​គំនូរ​ឡាទីន​។ ពាក្យ “Fridamania” ត្រូវបាន​គេ​បរិយាយ​ថា​ជា​ចំណាប់អារម្មណ៍​របស់​អ្នកស្រី Frida Kahlo និង​គំនូរ​របស់​អ្នកស្រី​។ ជីវិត​របស់​អ្នកស្រី និង​ស្នាដៃ​គំនូរ​របស់​អ្នកស្រី​បាន​ជះឥទ្ធិពល​យ៉ាងខ្លាំង​ទៅលើ​ទំនិញ ស្តា​យល៍​សម្លៀកបំពាក់ ហើយ​ព្រមទាំង​មាន​ការថត​ខ្សែភាពយន្ត​ចំណាយ​អស់​រាប់​លាន​ដុល្លារ​ផ្អែក​ទៅតាម​ខ្សែ​ជីវិត​របស់​អ្នកស្រី​ដោយ​មាន​ការ​ដើរតួ​សម្តែង​ដោយ​អ្នកនាង Salma Hayek ដោយ​រឿងនេះ​មាន​ចំណងជើង​ថា Frida​។​
​ជា​រៀងរាល់ឆ្នាំ​មាន​នារី​ក្មេងៗ​ជាច្រើន​ដែល​ឈាន​ទៅរ​កវ័យ​ជា​ស្ត្រី​បាន​យល់ដឹង​ពី​អ្នកស្រី Frida និង​ស្នាដៃ​គំនូរ​របស់​អ្នកស្រី​ថា​ជា​ស្ត្រី​ម្នាក់​ថ្វី​បើ​ជីវិត​ពោរពេញ​ដោយ​ទុក្ខសោក​ប៉ុន្តែ​បែរ​ជា​អាច​គូរគំនូរ​យ៉ាង​ស្រស់ស្អាត​។ បច្ចុប្បន្ន​នេះ​អ្នកស្រី Frida Kahlo គឺជា​និមិត្តរូប​តំណាងឱ្យ​ស្ត្រី​ការពារ​ស្ត្រី​របស់​ស្ត្រី​ជុំវិញ​ពិភពលោក​៕
“​ខ្ញុំ​បាន​ជួប​ទុក្ខ​ធំៗ​ពីរ​ក្នុង​ជីវិត មួយ​គឺ​ជួប​គ្រោះថ្នាក់​ចរាចរណ៍​ដោយ​រថយន្ត​បុក ចំណែក​មួយ​ទៀត​គឺ​បាន​ជួប Diego​។​” “​មូលហេតុ​ដែល​ខ្ញុំ​គូររូប​ខ្លួនឯង​ព្រោះ​ជារឿយៗ​ខ្ញុំ​ជា​មនុស្ស​ម្នាក់​ដែល​ឯកា ហើយ​ខ្ញុំ​គឺ​ជា​កម្មវត្ថុ​មួយ​ដែល​ខ្ញុំ​ខ្លួនឯង​ស្គាល់​ច្បាស់​ជាងគេ​។​” -Frida Kahlo

Copyright © 2018 Ladies Magazine Cambodia.