Relationships
ដំណោះស្រាយនៅពេលដែលកូនៗឈ្លោះគ្នា
មានអារម្មណ៍ថាមិនដឹងគួរដោះស្រាយយ៉ាងណានៅពេលដែលមានបញ្ហាខ្លះៗជាមួយកូនៗឬ? កុំបារម្ភអី យើងមាន
មានអារម្មណ៍ថាមិនដឹងគួរដោះស្រាយយ៉ាងណានៅពេលដែលមានបញ្ហាខ្លះៗជាមួយកូនៗឬ? កុំបារម្ភអី យើងមានដំណោះស្រាយដែលអាចជួយអ្នកបាន។ វាជារឿងធម្មតាពេលដែលអ្នកមានកូន អ្នកច្បាស់ជាជួបបញ្ហាដូចជាកូនៗឈ្លោះគ្នា ប្រកួតប្រជែងគ្នា ទាស់ពាក្យសម្តីគ្នា រករឿងគ្នាជាដើម។ ការឈ្លោះគ្នារបស់កូនៗគឺជាបន្លាក្នុងចិត្តរបស់ឪពុកម្តាយតាំងពីយូរណាស់មកហើយ អាចនិយាយបានថាវាជាដំណើរជីវិត និងជាផ្នែកមួយនៃវ័យលូតលាស់របស់ពួកគេ។ ក្នុងនាមជាឪពុកម្តាយយើងតែងតែស្រមៃចង់បានគ្រួសារដ៏ផ្អែមល្ហែមមួយដែលកូនៗចេះស្រលាញ់ និងគោរពគ្នា។ ក៏ប៉ុន្តែជីវិតពិតគឺមិនមែនដូច្នោះឡើយ។ ក្មេងនៅតែជាក្មេង នេះជារឿងធម្មជាតិដែលកូនជាទីស្រលាញ់របស់អ្នកនឹងឈ្លោះគ្នា វ៉ៃគ្នា ច្រណែនគ្នា មានគំនិតខុសគ្នា ញោះគ្នា ធ្វើបាបគ្នាទៅវិញទៅមក ក៏ប៉ុន្តែអ្នកអាចជួយពួកគេប្រែពីសត្រូវមកជាមិត្តភ័ក្តិបាន។ ជាឪពុកម្តាយរបស់គេ ពួកយើងសុទ្ធតែចេះគ្រប់គ្រងអារម្មណ៍ខ្លួនឯង ប៉ុន្តែសម្រាប់ក្មេងៗពួកគេអាចនឹងមិនដឹងអំពីចេតនាអាក្រក់របស់ខ្លួន។
ជារឿយៗយើងតែងតែលឺឪពុកម្តាយមួយចំនួនត្អូញត្អែរថាកូនៗរបស់ខ្លួនចេះតែឈ្លោះគ្នា បញ្ចេញកាយវិការមិនសមរម្យ ទន្ទ្រាំជើង ហៅគ្នាមិនល្អស្តាប់ ឬបោចសក់គ្នា បង្កើតបានជាជម្លោះនៅក្នុងផ្ទះ។ នេះជាពេលដែលលោកប៉ា និងអ្នកម៉ាក់គួរតែអង្គុយពិភាក្សាគ្នា និងសម្គាល់មើលពីសកម្មភាពមិនល្អរបស់កូនៗ។ ប្រសិនបើអ្នកមានការងាររវល់ច្រើន និងប្រញាប់ប្រញាល់ធ្វើការងារផ្ទះ អ្វីដែលអ្នកគួរធ្វើនោះគឺពង្រឹងជំនាញគ្រប់គ្រងកូនៗ និងយកចិត្តទុកដាក់អង្កេតលើអត្តចរិតមិនល្អរបស់កូនៗអ្នក។
នេះជាវិធីដែលជួយឱ្យកូនៗអ្នកមានអារម្មណ៍ស្ងប់ល្អ
ដំបូងចូរចាំថាការធ្វើជាឪពុកម្តាយគេគឺត្រូវការការយកចិត្តទុកដាក់ និងពេលវេលា។ ដើម្បីកាត់បន្ថយជម្លោះ អ្នកត្រូវធ្វើជាគំរូល្អដល់ពួកគេ ព្រោះថាកូនៗរបស់អ្នកនឹងរៀនសូត្រតាមអ្នកពេលដែលអ្នកដោះស្រាយជម្លោះនៅក្នុងផ្ទះ និងនៅក្រៅផ្ទះ។ ចូរដោះស្រាយដោយសន្តិវិធី និងបង្កប់អារម្មណ៍សប្បាយៗ។ ចំណុចទីពីរ អាយុរបស់ក្មេង និងដើមហេតុនៃជម្លោះគឺជាកត្តាសំខាន់ដែលអ្នកគួរតែស្វែងយល់ និងពិចារណា។ ចូរកម្ចាត់ចេតនាមិនល្អទាំងឡាយចោលមុនពេលដែលពួកគេបាត់បង់ការគោរពខ្លួនឯង និងមានទំនាក់ទំនងមិនល្អជាមួយគ្នា។ វិធីមួយដែលអ្នកអាចជួយឱ្យកូនៗរបស់អ្នកមានមោទកភាពចំពោះខ្លួនឯងគឺបង្រៀនពួកគេឱ្យចេះជួយការងារដូចជាដូរកន្ទបប្អូន ឬបញ្ចុកបាយប្អូនជាដើម។ ការធ្វើបែបនេះអាចជួយឱ្យសម្ព័ន្ធភាពបងប្អូនពួកគេកាន់តែរឹងមាំ។
ក្នុងនាមជាឪពុកម្តាយ អ្នកក៏គួរតែធ្វើជាគ្រូបង្វឹក មិត្តភ័ក្តិដែលផ្តល់យោបល់ល្អៗ ដើម្បីជួយឱ្យពួកគេអាចប្រាស្រ័យទាក់ទង និងដោះស្រាយទំនាស់របស់ពួកគេបានល្អ។
ចូរដាក់វិន័យគ្រឹះ និងកំណត់គោលការណ៍ទូទៅសម្រាប់កូនៗរបស់អ្នក និងបង្រៀនពួកគេឱ្យចេះគោរពគ្នាទៅវិញទៅមក។ ត្រូវធ្វើយ៉ាងណាឱ្យពួកគេដឹងថាក្នុងផ្ទះនេះមិនអនុញ្ញាតឱ្យមានការធ្វើបាប ឬកាយវិការមិនសមរម្យឡើយ ហើយអ្វីដែលអ្នកគួរយកចិត្តទុកដាក់នោះគឺបង្រៀនកូនរបស់អ្នកឱ្យមានទឹកចិត្តសណ្តោស និងមានភាពជិតស្និទ្ធជាមួយគ្នាទៅវិញទៅមក។
ការស្រលាញ់កូនឱ្យស្មើគ្នាគឺមិនអាចទៅរួចឡើយ ដូច្នេះអ្នកមិនត្រូវបែងចែក ឬប្រៀបធៀបពួកគេឡើយ ការធ្វើបែបនេះអាចបង្កឱ្យមានភាពល្អក់កករនៅក្នុងសម្ព័ន្ធភាពបងប្អូនរបស់ពួកគេបាន។ មិនត្រូវលំអៀង ឬទម្រើសពួកគេពេកឡើយ។ កូនរបស់អ្នកអាចនឹងយល់ថាការប្រៀបធៀបរបស់អ្នកគឺជាការរិះគន់។ ចូរព្យាយាមធ្វើចំពោះពួកគេដោយស្មើភាពគ្នា។ ផ្តល់ភាពជឿជាក់ដល់ពួកគេ ត្រូវមានហេតុផលត្រឹមត្រូវពេលដែលអ្នកសម្រេចចិត្តធ្វើអ្វីមួយ និងឱ្យពួកគេធ្វើការរិះគិតរៀងខ្លួន ធ្វើឱ្យពួកគេយល់ពីអត្តសញ្ញាណរបស់ខ្លួន និងយល់ពីហេតុផលរបស់អ្នក។
មិនត្រូវឱ្យកូនរបស់អ្នកមានអារម្មណ៍ថាចាញ់ឡើយ ព្រោះថារឿងនេះពួកគេមិនអាចទទួលយកបានឡើយជាពិសេសនៅពេលដែលពួកគេកំពុងតែប្រកួតប្រជែងជាមួយបងបង្កើតរបស់ខ្លួន។
ក្នុងនាមជាមនុស្សធំ អ្នកគួរតែបង្រៀនកូនរបស់អ្នកថារាល់សកម្មភាពដែលពួកគេធ្វើគឺសុទ្ធតែនាំមកនូវលទ្ធផល អ្នកត្រូវជួយពួកគេពង្រឹងសម្ព័ន្ធភាពបងប្អូនឱ្យកាន់តែប្រសើរឡើង។
លោកស្រី Lina Ashar អ្នកត្រួសត្រាយការអប់រំសម្រាប់ក្មេងៗក្នុងសកលលោក និងជាស្ថាបនិកនៃ Kangaroo Kids ព្រមទាំង Billabong High International School បានពណ៌នាអំពីអាកប្បកិរិយាដ៏មានគ្រោះថ្នាក់ និងជាបញ្ហាដ៏ធ្ងន់ធ្ងរផងដែរ។ នេះជាអ្វីដែលលោកស្រី Ashar បានចែករំលែកជាមួយយើងទាំងអស់គ្នា៖ “ក្ដីកង្វល់ដែលកើតមានអំពីការឈ្លោះប្រកែកគ្នារបស់បងប្អូនបង្កើតគឺពិតជាសំខាន់ខ្លាំងណាស់សម្រាប់ការយកចិត្តទុកដាក់របស់ឪពុកម្ដាយ”។ នៅពេលដែលឪពុកម្ដាយលើកសរសើរកូនម្នាក់ នោះកូនម្នាក់ផ្សេងទៀតនឹងមានអារម្មណ៍ថាខ្លួនឯងដូចត្រូវបានគេបោះបង់ចោល មិនទទួលបានការស្រលាញ់ និងគ្មានតម្លៃទាល់តែសោះ។ បងប្អូនបង្កើតពិតជាបានចំណាយពេលវេលាជាច្រើនជាមួយគ្នាពិតមែន ពួកគេចែករំលែកអ្វីៗដែលពួកគេមានឱ្យគ្នាទៅវិញទៅមក ពួកគេកើតមកគឺមានចំនុចខុសប្លែកគ្នា ហើយប្រាកដណាស់ដែលម្នាក់ក្នុងចំណោមម្នាក់ផ្សេងទៀតមានបំណងចង់ឱ្យខ្លួនឯងមានភាពប្រសើរជាង។ នេះជាចំណុចស្នូលដែលបង្កឱ្យមានការអាក់អន់ចិត្តកើតមានឡើង និងជាដំណាក់កាលដែលធ្វើឱ្យបងប្អូនបង្កើតមានការឈ្លោះប្រកែកគ្នា។ ពេលខ្លះការឈ្លោះប្រកែកគ្នារបស់ពួកគេគឺសាមញ្ញធម្មតាតែប៉ុណ្ណោះ ហើយពេលខ្លះទៀតវាកាន់តែធ្ងន់ធ្ងរ ហើយពេលខ្លះទៀតពួកគេអាចនឹងអាក់អន់ចិត្តនឹងគ្នាអស់មួយជីវិតតែម្ដងក៏ថាបាន។ ការសិក្សាទៅលើករណីមួយរវាង Tennis champs Venus និង Serena Williams ដែលជាបងប្អូនស្រីបង្កើតនឹងគ្នា។ ក្នុងតុលាការ ពួកគេទាំងពីរនាក់ប្រកែកគ្នាដណ្ដើមយកឈ្នះរៀងខ្លួន ហើយការប្រកួត ប្រជែងរបស់ពួកគេគឺសាហាវខ្លាំងតែម្ដង។ ពួកគេទទួលបានជ័យជំនះរៀងៗខ្លួនក្នុងតុលាការ និងទទួលបានចំណាត់ថ្នាក់លេខ ១ ពិភពលោកក្នុងអាជីពការងាររបស់ពួកគេ។ ទោះបីជាយ៉ាងណាក៏ដោយ បងបងប្អូនស្រីទាំងពីរនាក់នេះពិតជាមានទំនាក់ទំនងស្អិតរមួតនឹងគ្នាខ្លាំងណាស់។
អ្នកជាម្ដាយត្រូវតែស្ថិតនៅកណ្ដាល រួចសង្កេតមើលថាតើអ្នកអាចជួយអ្វីបានខ្លះដើម្បីឱ្យកូនៗមានទំនាក់ទំនងល្អនឹងគ្នា។ ឪពុកម្ដាយត្រូវតែគិតគូរដល់កូនគ្រប់ៗរូបនៅពេលដែលពួកគេមានកូនច្រើន។ ម្យ៉ាងវិញទៀត ឪពុកម្ដាយត្រូវតែរក្សាបង្កាកុំឱ្យកើតមានការច្រណែន ប្រជែងដោយនិយាយប្រាប់កូនៗអំពីសារសំខាន់នៃគ្រួសារ និងការចេះជួយគ្នារវាងបង និងប្អូនបង្កើត។ ការដែលកើតមានជម្លោះរវាងបងប្អូនជាប្រចាំនឹងធ្វើឱ្យពួកគេមានតែការចុះខ្សោយ និងភាពឈឺចាប់តែប៉ុណ្ណោះ។
ឪពុកម្ដាយត្រូវតែប្រយ័ត្នប្រយែងនៅពេលដោះស្រាយជាមួយកូនៗ៖
• ប្រព្រឹត្តិចំពោះកូនម្នាក់ៗឱ្យដាច់ដោយឡែកពីគ្នា ព្រោះពួកគេមានភាពខុសប្លែកពីគ្នា
• អនុញ្ញាតឱ្យកូនៗរបស់អ្នកដោះស្រាយបញ្ហាដោយខ្លួនឯង អ្នកអាចលូកដៃនៅពេលណាដែលស្ថានការណ៍ធ្ងន់ៗតែប៉ុណ្ណោះ។
• អនុញ្ញាតឱ្យពួកគេបង្ហាញពីអារម្មណ៍រៀងៗខ្លួន។
• ប្រតិបត្តិខ្លួនឱ្យដូចជាអាជ្ញាកណ្ដាល មិនមែនអ្នកវិនិច្ឆ័យឡើយ។
ប្រអប់ទី ២
អ្វីដែលអ្នកត្រូវចៀសវាង៖
ប្រៀបធៀបរវាងកូន និងកូនឱ្យសោះ ពួកគេមានចំណុចល្អ និងអាក្រក់ខុសប្លែកពីគ្នា ហើយពួកគេរួបរួមគ្នាដើម្បីទទួលបានអានុភាពមួយផ្សេងទៀត។
• កុំកាន់ជើងតែម្ខាង។
• កុំបង្ខំឱ្យម្នាក់លើកលែងទោស ឬសុំអភ័យទោស។
• កុំស្រែក ច្រឡោត ឬវាយកូនៗរបស់អ្នក៕
