Entertainment
ចំណាស់តែសង្ហា
មិនថាជាអាជីពអ្នកច្នៃម៉ូដសម្លៀកបំពាក់ ឬជាអ្នកដឹកនាំរឿងដែលឈ្នះពានរង្វាន់ឡើយ លោក Tom Ford គឺជាមនុស្សម្នាក់ដែល
មិនថាជាអាជីពអ្នកច្នៃម៉ូដសម្លៀកបំពាក់ ឬជាអ្នកដឹកនាំរឿងដែលឈ្នះពានរង្វាន់ឡើយ លោក Tom Ford គឺជាមនុស្សម្នាក់ដែលពោរពេញដោយទេពកោសល្យ ថ្វីបើលោក Tom Ford មានវ័យ ៥៥ ឆ្នាំក៏ដោយតែរូបរាងរបស់លោកមើលទៅគឺដូចជាអ្នកមានអាយុមិនលើសពី ៤៥ ឆ្នាំឡើយ ទាំងនេះក៏ដោយសារតែទេពកោសល្យច្នៃប្រឌិតរបស់លោកក្នុងការបង្កើតម៉ាកផ្ទាល់ខ្លួនដែលរកបានប្រាក់ ចំណូលជាង ១ ពាន់លានដុល្លាជារៀងរាល់ឆ្នាំ តាមរយៈហាង Tom Ford ទាំង ១១២ ហាងរបស់ខ្លួននៅជុំវិញពិភពលោក។ ស្តាយល៍របស់លោកបានអភិវឌ្ឍជាស្តាយល៍ទាន់សម័យបែបសិចស៊ីទាក់ទាញអារម្មណ៍ ពោលគឺខុសប្លែកគ្នាទាំងស្រុងពីស្តាយល៍ពីមុនកាលពីពេលដែលលោកធ្វើការឱ្យក្រុមហ៊ុនធំៗដូចជាម៉ាក Gucci និង Yves Saint Laurent។
Porno-chic Wave គឺជាស្តាយល៍ដែលលោក Ford បានដាក់ចេញកាលពីឆ្នាំ ១៩៩០ ដែលទទួលបានការពេញនិយមជាខ្លាំង។ កូឡិហ្សិនរបស់លោកត្រូវបានគេទទួលស្គាល់ភ្លាមៗតាមរយៈម៉ូដអាវកស្រួច និងម៉ូដខ្លីៗ។
ការបំពានវិន័យគឺជារឿងធម្មតារបស់លោក Ford ទៅហើយ តួយ៉ាងកាលពីកូឡិកហ្សិននិទាឃរដូវឆ្នាំ ២០០៣ លោកបានអញ្ជើញនាង Carmen Kass ធ្វើជាតារាផ្សព្វផ្សាយដោយឱ្យនាងកោររោមកេរ្តិ៍ខ្មាសចេញជារាងអក្សរ G។ ការផ្សាយពាណិជ្ជកម្មនេះត្រូវបានគេហាមប្រាមដោយសារតែអ្នកកាសែតបញ្ចេញមតិមិនយល់ស្របដោយលើកឡើងថា “ការផ្សព្វផ្សាយបែបនេះគឺមិនខុសពីក្រុមអ្នករកស៊ីផ្លូវភេទ និងពួកដែលផ្សព្វផ្សាយសេវាបម្រើផ្លូវភេទតាមទូរសព្ទឡើយ។” ក៏ប៉ុន្តែថ្វីបើការផ្សព្វផ្សាយនេះមានភាពចម្រូងចម្រាស តែរឿងនេះក៏បានធ្វើឱ្យមនុស្សជាច្រើននាំគ្នាចាប់អារម្មណ៍ជាមួយស្នាដៃរបស់លោក Ford ផងដែរ។
លោកពិពណ៌នាខ្លួនឯងថាជាមនុស្សស្មោះត្រង់ មានភាពជឿជាក់តែស្ទាក់ស្ទើរចំពោះខ្លួនឯង តែលោកក៏បានអភិវឌ្ឍមកក្លាយជាមនុស្សដែលអត់ធ្មត់ និងមានភាពចាស់ទុំ។ នេះប្រហែលមកពីលោកប្តូរចំណាប់អារម្មណ៍មកផ្តោតលើការដឹកនាំរឿងភាពយន្តវិញ ដែលជាស្នេហាដំបូងរបស់លោក។
បន្ទាប់ពីដឹកនាំរឿង A Single Man ដែលគ្រប់គ្នាទន្ទឹងរង់ចាំកាលពី ២ ឆ្នាំមុនមក លោកក៏បានដឹកនាំរឿង Nocturnal Animals ជាប្រភេទរឿងរ៉ូមែនទិកបែបព្រឺព្រួចចូលរួមសម្តែងដោយលោក Jake Gyllenhaal និងនាង Amy Adams ជាខ្សែភាពយន្តបង្កប់ន័យអប់រំដែលបង្រៀនមនុស្សកុំឱ្យឆាប់បោះបង់គ្នាចោល។
បច្ចុប្បន្ននេះលោក Ford បានប្រែក្លាយជាមនុស្សដែលរីករាយនឹងធម្មជាតិ និងកក់ក្តៅ និងងាយនិយាយជាមួយជាងកាលពីមុនពេលដែលលោកធ្វើការឱ្យម៉ាក Gucci។ “បច្ចុប្បន្ននេះសិចគឺជារឿងធម្មតាហើយ វាមិនមែនជារឿងថ្មី ឬជាបញ្ហាអ្វីទៀតឡើយ។” លោក Ford ពេលនេះគឺនៅតែមានរូបរាងសង្ហាសិចស៊ីដូចលោក Ford ពីមុនដូច្នោះដែរ៕
