លោក អេឡិក
លោក អេឡិក បកស្រាយរឿងមានស្រីច្រើន
ប្រភពអ្នកជិតស្និទ្ធស្និតជាមួយតារាសម្ដែងលោក អេឡិក បានឱ្យដឹងថា តារាសម្ដែងរូបនេះសំបូរស្រីច្រើន ពីព្រោះពេលលោកទៅ ណាមកណាគេតែងតែឃើញមានស្រីៗនៅក្បែរខ្លួនច្រើន ហើយកម្រឃើញលោកដើរលេង ឬនៅជួបជុំជាមួយប្រុសៗដូចគ្នាណាស់។
ទាក់ទងនឹងពាក្យចរចាមអារ៉ាមខាងលើនេះ លោក អេឡិក បានបកស្រាយថា លោកទទួលស្គាល់ចំពោះការដើរទៅណាមកណាមាន ស្រីៗនៅក្បែរខ្លួនច្រើន ប៉ុន្ដែស្រីៗទាំងអស់នោះសុទ្ធតែជាមិត្ដភ័ក្ដិ និងអ្នករួមអាជីពជាមួយគ្នា។ លោកអះអាងថា "មែន! ខ្ញុំឧស្សាហ៍ នៅជួបជុំជាមួយស្រីៗមែន តែពួកយើងអត់មានស្នេហាអីជាមួយគ្នាទេ។ និយាយរួមទៅសុទ្ធតែមិត្ដភ័ក្ដិ និងអ្នករួមអាជីពជាមួយគ្នា តែប៉ុណ្ណោះ"។ លោកបញ្ជាក់បន្ថែមថា កុំថាឡើយអ្នកជិតខាងនិយាយគ្នាថាលោកមានស្រីៗនៅក្បែរខ្លួនច្រើន សូម្បីតែត្រចៀកលោក ផ្ទាល់ក៏ធ្លាប់បានឮអ្នកជិតខាងនិយាយដែរ។ ចំពោះពាក្យថា លោកកម្រជួបជុំជាមួយមិត្ដភ័ក្ដិប្រុសៗដូចគ្នានោះគឺជារឿងមិនត្រឹមត្រូវ ទេ តាមពិតលោកក៏ឧស្សាហ៍ជួបជុំជាមិត្ដភ័ក្ដិប្រុសៗដែរ ប៉ុន្ដែប្រហែលជាអ្នកនិយាយនោះមិនបានចាប់អារម្មណ៍ក៏ថាបាន។
លោក អេឡិក ដែលមានកម្ពស់១៨៤សង់ទីម៉ែត្រទើបតែលេចមុខក្នុងខ្សែភាពយន្ដភាគរឿង "ដែកសំលៀងចិត្ដ" របស់ទូរទស្សន៍ បាយ័ន។ លោកបានឱ្យដឹងថា នេះជាលើកដំបូងហើយដែលលោកបានសម្ដែងខ្សែភាពយន្ដ ចាប់តាំងពីលោកបានចូលប្រឡូក ក្នុងវិស័យសិលុ្បះកាលពីចុងឆ្នាំ២០១០ ហើយនៅក្នុងរឿងនោះលោកដើរតួរង។ បន្ទាប់ពីលោកបានលេចមុខនៅក្នុងខ្សែភាព យន្ដភាគរបស់ទូរទស្សន័បាយ័នមក អង្គការឆែមក្តីបានទាក់ទងលោកឱ្យថតខ្សែភាគអប់រំ។
តារារូបនេះបានឱ្យដឹងថា រឿងភាគរបស់អង្គការឆែមមានចំណងជើងថា "ឈូកក្នុងបឹងភក"ដែលមានចំនួន១៥ភាគ ហើយផ្ដោត លើការអប់រំ៤ចំណុចសំខាន់ៗ។ ទីមួយអប់រំទាក់ទងនឹងការប្រើអំពើហឹង្សាក្នុងគ្រួសារ ឬការព្យាបាទគ្នាទៅវិញទៅមក ព្រោះតែ គ្រឿងស្រវឹង ហើយទីពីរអប់រំអំពីជំងឺអេដស៍។ ទីបីនិយាយពីយុវជនដែលចាញ់បោកគេនៅតាមបណ្ដាខេត្ដ ព្រោះតែចង់បានការងារ ធ្វើ និងភាពអវិជ្ជា ហើយចុងក្រោយនិយាយពីស្នេហាត្រីកោណ។ អេឡិកប្រាប់ថា នៅក្នុងរឿង "ឈូកក្នុងបឹងភក់"នេះ ខ្ញុំសម្ដែងរួម ជាមួយកញ្ញា នៅ សុនីតា និងលោក ហង្ស សម្បើមស័ក្ដិ ពិធីករទូរទស្សន៍អាស៊ីអាគ្នេយ៍ តែខ្ញុំសម្ដែងជាតួរង។
លោកអេឡិកមានដើមកំណើតនៅរាជធានីភ្នំពេញបានចូលប្រឡូកក្នុងវិស័យសិល្បះកាលពីដើមឆ្នាំ២០១០តាមរយះថតស្ទីលម៉ូដសំលៀកបំពាក់ប្រចាំថ្ងៃឱ្យទស្សនាវដ្ដីម៉ែន។ បន្ទាប់មកលោកក៏បានចូលជាសមាជិកក្នុងក្រុមបង្ហាញម៉ូដមួយ ហើយក៏ចេះតែមាន ការងារសិល្បះបន្ដបន្ទាប់ រហូតដល់បានថតស្ប៉តពាណិជ្ជកម្ម និងខ្សែភាពយន្ដរឿង "ដែកសំលៀងចិត្ដ" និង "ឈូកក្នុងបឹងភក់"។
កញ្ញា ស៊ិន រតនា
កញ្ញា ស៊ិន រតនា ត្រៀមខ្លួនទទួលយកភាពជោគជ័យ 
តារាសម្ដែងស្រីដែលទើបរះក្នុងពិភពសិល្បះខ្មែរកញ្ញា ស៊ិន រតនា កំពុងត្រៀមខ្លួនទទួលយកភាពល្បីល្បាញ បន្ទាប់ពីចាប់បាន ឳកាសមាសសម្រាប់តួឯកស្រីដែលជួបជាមួយតួប្រុសជនជាតិកូររ៉លោក Kim San សម្រាប់រឿង"ព្រះអាទិត្យរះក្នុងក្រុងសេអ៊ូល" ផលិតដោយផលិតកម្មឯករាជ្យភាពយន្ដ សហការជាមួយក្រុមហ៊ុន Hansol International Co., Ltd និង CC Corperation Co., Ltd ។
កញ្ញា ស៊ិន រតនា ប្រាប់ឱ្យដឹងថា នេះជាឳកាសលើកដំបូងដែលនាងបានបង្ហាញខ្លួនក្នុងខ្សែភាពយន្ដ ហើយទទួលបានជាតួឯកថែម ទៀត។ កញ្ញានិយាយថា "ខ្ញុំពិតជារំភើបណាស់ ខ្ញុំបានសម្ដែង រឿងលើកដំបូង ហើយជាតួឯក។ អ្វីដែលកាន់តែអស្ចារ្យសម្រាប់ ខ្ញុំគឺបានសម្ដែងជាមួយតួកូររ៉ ហើយបានចេញទៅសម្ដែងនៅប្រទេសកូររ៉ថែមទៀត"។ តារាដែលមានកម្ពស់១,៦៧សង់ទីម៉ែត្រ រូបនេះរៀបរាប់ពីសាច់រឿងថា នាងឈ្មោះ តាវីតា ជាកូនអ្នកក្រនៅស្រុកស្រែចម្ការ។ នាងបានមករកការងារធ្វើនៅភ្នំពេញ ព្រោះតែ ឪពុកឈឺ ហើយជំពាក់ប្រាក់ធនាគារ។ នាងបានចាញ់ប្រោកគេ ពេលដល់ក្រុងភ្នំពេញ ប៉ុន្ដែក្រោយមកនាងបានចូលរៀនភាសាកូរ៉េ ហើយក៏បានធ្វើការនៅក្នុងក្រុមហ៊ុនកូរ៉េមួយនៅភ្នំពេញ។ បន្ទាប់មកនាងបានចេញទៅធ្វើការនៅប្រទេសកូរ៉េ ហើយជួបការលំបាក យ៉ាងខ្លាំង ប៉ុន្ដែបានបុរសកូរ៉េជួយនាងគ្រប់យ៉ាង។ បុរសកូរ៉េបានជួយនាង និងស្រលាញ់នាងយ៉ាងខ្លាំង ប៉ុន្ដែ ទីបំផុតតាវីតាមិនបាន ជួបគ្នាជាមួយបុរសកូរ៉េនោះ បែរជាមកជួបស្នេហ៌នៅស្រុកកំណើតវិញ។
កញ្ញា ស៊ិន រតនា បានលើកឡើងថា ខ្សែភាពយន្ដភាគរឿង "ព្រះអាទិត្យរះក្នុងក្រុងសេអ៊ូល"ជាខ្សែភាពយន្ដភាគអប់រំទាក់ទងនឹង ប្រជាជនដែលចង់ទៅធ្វើការនៅក្រៅប្រទេស។ មុននឹងសម្រេចចិត្ដចេញទៅធ្វើការនៅក្រៅប្រទេស ស្ដ្រីខ្មែរគួរសិក្សាស្វែងយល់ ឱ្យបានច្បាស់លាស់មុននឹងសម្រេចទៅធ្វើការនៅស្រុកគេ បើពុំដូច្នោះទេងាយនឹងចាញ់បោកគេណាស់។ នាងនិយាយថា "ខ្ញុំសង្ឃឹមថា តាមរយះសាច់រឿង នឹងជួយផ្ដល់គំនិតអប់រំដល់ស្ដ្រីខ្មែរក្នុងការស្វែងរកការងារធ្វើ ហើយធ្វើយ៉ាងណាទើបចេញទៅធ្វើការស្រប ច្បាប់ ។ ម្យ៉ាងទៀតរឿងនេះនឹងជួយកាត់បន្ថយ និងទប់ស្កាត់ការចាកចេញទៅធ្វើការនៅក្រៅស្រុកបានច្រើន"។
ស៊ិន រតនា អះអាងថា នាងនឹងទទួលបានជោគជ័យសម្រាប់ការសម្ដែងភាពយន្ដជាលើកដំបូងនេះ។ ទីមួយគឺដោយសារតែ នាងបានសម្ដែងជាមួយតួប្រុសកូរ៉េ ទីពីរឈុតឆាកសម្ដែចេញទៅថតនៅប្រទេសកូរ៉េ និងទីបីមានតួកូរ៉េពីរបីនាក់ ព្រមទាំង តារាខ្មែរមួយចំនួនទៀតផងដែរ។ ក្រៅពីកំពុងតែលេចមុខជាតួឯក កញ្ញាក៏បានទទួលបានការងារជាតារាម៉ូដែលប្រចាំផលិតកម្ម IRIS ប្រចាំនៅប្រទេសកម្ពុជាទៀតផង។
កញ្ញា មាន សូនីតា
មាន សូនីតា ២០១២ដើរតួឯក និងជំនួសតំណែងដាលីស 
កញ្ញា មាន សូនីតាបានស្ងប់ស្ងាត់ពីពិភពសិល្បបន្ដិច បន្ទាប់ពីបានផុតកុងត្រាជាមួយក្រុមហ៊ុន Freshie ។ តារាសិល្បដែលល្បីឈ្មោះខ្លាំងតាមរយះស្ប៉តពាណិជ្ជកម្មកាលពីឆ្នាំ ២០១០រូបនេះបានឱ្យដឹងថា ពេលនេះកញ្ញាទើបចាប់ផ្ដើមចូល ប្រឡូកក្នុងពិភពខ្សែភាពយន្ដជាលើកដំបូងហើយជាតួឯក និងក្ដោបបានឳកាសធ្វើជាពិធីការិនីក្នុងកម្មវិធីមួយរបស់ស្ថានីយទូ រទស្សន៍ប៉ុស្ដិ៍លេខ៥ ដែលជាកន្លែងរបស់កញ្ញា អឿន ដាលីស ទៀតផង។ព្រមជាមួយគ្នាអតីត Freshie រូបនេះក៏ចូល បម្រើការងារមួយនៅក្នុងអង្គការដើម្បីជួយជនក្រីក្រ ស្ដ្រីមានវិបត្ដិ និងក្មេងកំព្រាផងដែរ។ សូនីតាបានផ្ដល់បទសម្ភាសន៍ជាមួយ ឡេឌីស៍ទាក់ទងនឹងការងារអង្គការ ការងារសិល្ប និងការសិក្សាដែលមានខ្លឹមសារដូចខាងក្រោម ៖
ឡេឌីស័ ៖ សួស្ដីសូនីតាសុខសប្បាយជាទេ? មួយរយះពេលបាត់មុខពីសិល្បទៅណាដែរ?
សូនីតា ៖ ចាស៎សួស្ដី! ខ្ញុំសុខសប្បាយធម្មតា។ មួយពេលនេះខ្ញុំមិនសូវបានចេញមុខនៅក្នុងវិស័យសិល្បមែន ពីព្រោះខ្ញុំជាប់ធ្វើការនៅអង្គការ និងការសិក្សា ហើយម្យ៉ាងទៀតខ្ញុំទើបផុតកុងត្រាជាមួយក្រុមហ៊ុនFreshie ។ ដូច្នេះហើយបានជាហាក់ដូចឃ្លាតឆ្ងាញពីសិល្បមួយរយះពេលខ្លីតែមិត្ដអ្នកអានឡេឌីស៍នឹងបានឃើញតាម ខ្សែភាពយន្ដក្នុងពេលឆាប់ខាងមុខនេះ។
ឡេឌីស័ ៖ តើសូនីតាធ្វើការនៅអង្គការអ្វី និងសេវាការងារយ៉ាងណាខ្លះ?
សូនីតា ៖ ខ្ញុំធ្វើការនៅអង្គការ People Improvement Organization។ អង្គការនេះមានបីសាខានៅរាជធានីភ្នំពេញមានសិស្ស ចូលរៀនជិតមួយពាន់នាក់។ អង្គការដែលខ្ញុំធ្វើនេះគឺជាកន្លែងជួយបណ្ដុះ បណ្ដាលការងារ និងអប់រំដល់ជនក្រីក្រ ក្មេងកំព្រា និងស្ដ្រីមានវិបត្ដិជាដើម។ ក្នុងអង្គការផ្ដល់នូវការអបរំភាសាខ្មែរ អង់គ្លេស កុំព្យួទ័រ កាត់ដេរសំលៀកបំពាក់ និងមានរហូតបង្ហាត់បង្រៀនរបាំជាដើមហើយក្រុមរបាំប្រចាំអង្គការនេះក៏មានចូលរួមសម្ដែងក្នុងកម្មវិធី ផ្សេងៗជាច្រើនដែរ។
ឡេឌីស័ ៖ តើកញ្ញាចាប់ផ្ដើមធ្វើការនៅអង្គការនេះពីពេលណា ហើយផ្នែកអ្វីដែរ?
សូនីតា ៖ ខ្ញុំបានចាប់ផ្ដើមធ្វើនៅអង្គការ People Improvement Organization តាំងពីឆ្នាំ២០០៥មកម៉្លេះ។ កាលណោះខ្ញុំមិនក្លាយជាអ្នកសិល្បទេ ហើយខ្ញុំធ្វើជាអ្នកបង្ហាត់បង្រៀនភាសាខ្មែរ និងអង់គ្លេសដល់ក្មេងៗ។ ក្រោយមកខ្ញុំក៏ឈប់បង្ហាត់បង្រៀន ប្ដូរមកធ្វើការនៅក្នុងការិយាល័យវិញម្ដង។ នៅក្នុងការិយាល័យខ្ញុំជាជំនួញការគណនេយ្យ និងធ្វើការផ្នែកខាងរដ្ឋបាលផងដែរ។
ឡេឌីស័ ៖ ហេតុអ្វីបានជាកញ្ញាចូលធ្វើការនៅក្នុងអង្គការរហូតមកពេលនេះ?
សូនីតា ៖ ចាស៎អរគុណ! វាជាចំណងចំណូលចិត្ដរបស់ខ្ញុំ គឺមិនមែនកើតឡើងដោយសារតែប្រាក់កំរ៉ៃអីនោះ។ បើសិនជាខ្ញុំចង់បាន ប្រាក់ ខ្ញុំមិនអាចធ្វើការនៅកន្លែងបែបនេះទេ។ ក្នុងចិត្ដរបស់ខ្ញុំគឺដកអារម្មណ៍ជាប់ជានិច្ចក្នុងការជួយដល់ ជនក្រីក្រ។ ខ្ញុំស្រលាញ់ក្មេងៗ ណាស់ ពេលឃើញក្មេងខ្វះខាត់ រើសសំរាមម្ដងៗខ្ញុំមានចិត្ដអាណិតអាសូណាស់។ ខ្ញុំគិតថា ខ្ញុំនឹងខិតខំជួយដល់កុមារកំព្រា ស្ដ្រីមានវិបត្ដិ ដើម្បីឱ្យពួកគាត់អាចទទួលបានការអប់រំរស់នៅសមរម្យដូចគេឯង។ តាមពិតខ្ញុំកើតមកនៅក្នុងគ្រួសារមួយដែលមានជីវភាពធូរសមរម្យ នៅក្នុងសង្គម ខ្ញុំមិនធ្លាប់ទទួលរងការលំបាកទេ តែខ្ញុំអាណិតក្មេងៗណាស់ ពេលឃើញពួកគេដើររើសំរាម ដើរសមទាន ឬធ្វើការធ្ងន់ហួសប្រមាណ។ អ៊ីចឹងក្នុងចិត្ដខ្ញុំចង់ជួយពួកគាត់តាមសមត្ថភាពដែលអាចធ្វើទៅបាន។
ឡេឌីស័ ៖ ចុះទៅថ្ងៃខាងមុខ កញ្ញានៅតែមានចំណងចំណូលចិត្ដធ្វើការជាមួយអង្គការអប់រំបន្ដទៀតទេ?
សូនីតា ៖ បើខ្ញុំអាច ខ្ញុំនៅតែបន្ដធ្វើការជាមួយអង្គការអប់រំតទៅទៀត ពីខ្ញុំស្រលាញ់ចូលចិត្ដក្មេងៗ និងចង់ជួយឱ្យពួកគេឱ្យមាន ចំណេះដឹងពេលពួកគេធំឡើង។ ខ្ញុំមិនទាន់ហ៊ានធានាថា ខ្ញុំអាចធ្វើការបែបនេះដល់ពេលណាដែរ។ ទោះខ្ញុំមិនបានធ្វើការនៅអង្គការ នៅថ្ងៃណាមួយ ក៏ខ្ញុំនៅតែមានបន្ដជួយកុមារកំព្រា និងអ្នកខ្វះខាត់ដទៃតាមសមត្ថភាពរបស់ខ្ញុំ។
ឡេឌីស័ ៖ ក្រៅពីការងារនៅអង្គការ តើកញ្ញាជាប់រវល់ធ្វើអ្វីផ្សេងទៀតទេ?
សូនីតា ៖ ក្រៅពីការងារ ខ្ញុំក៏ជាប់នឹងការសិក្សាដែរ។ សព្វថ្ងៃខ្ញុំកំពុងរៀនឆ្នាំទី២នៅសាកលវិទ្យាល័យបញ្ញាសាស្ដ្រ ផ្នែកគ្រប់គ្រង។ តាមពិតខ្ញុំបានបញ្ចប់បរិញ្ញាប័ត្រផ្នែកធនាគារ និងហិរញ្ញវត្ថុនៅសាកលវិទ្យាល័យបៀលប្រាយក្នុងឆ្នាំ២០១០។
ឡេឌីស័ ៖ ចុះសម្រាប់លទ្ធផលនៃការសិក្សាកញ្ញាទទួលបានយ៉ាងណា ហើយធ្លាប់ប្រឡងធ្លាក់ទេ?
សូនីតា ៖ តាំងពីខ្ញុំរៀនបរិញ្ញាប័ត្រនៅសាកលវិទ្យាល័យបៀលប្រាយ និងចូលមករៀននៅសាកលវិទ្យាល័យបញ្ញាសាស្ដ្រនេះ ខ្ញុំទទួលបានល្អគួរសម។ ពីព្រោះតែងតែយកចិត្ដទកដាក់ការសិក្សាជាងការងារផ្សេងៗ បើទោះជាខ្ញុំក្លាយជាអ្នកសិល្បហើយក្ដី។ តាមពិតខ្ញុំមិនធ្លាប់ប្រឡងធ្លាក់ម្ដងណាឡើយ យ៉ាងហោចណាស់ខ្ញុំគ្រាន់តែធ្លាក់ពិន្ទុតែប៉ុណ្ណោះ។
ឡេឌីស័ ៖ តើកញ្ញាមានវិធីសាស្ដ្របែបណាក្នុងការសិក្សា?
សូនីតា ៖ ខ្ញុំមិនមែនជាសិស្សពូកែទេ ហើយក៏មិនមែនជាសិស្សខ្សោយដែរ តែខ្ញុំក៏ទទួលបានលទ្ធផលល្អគួរសមសម្រាប់ការសិក្សារបស់ខ្ញុំ។ ខ្ញុំគ្រាន់តែចង់ចែករំលែកបទពិសោធន៍នៃការសិក្សាខ្លះៗដល់មិត្ដ អ្នកអានទស្សនាវដ្ដីឡេឌីស៍គឺទីមួយការសិក្សា ជាក្រុម ទីពីរចូលអានសៀវភៅនៅក្នុងការិយាល័យ ទីបីការស្រាវជ្រាវ ការពឹងពាក់មិត្ដភ័ក្ដិ និងមើលមេរៀននៅផ្ទះ។ ការសិក្សាជាពិតជាសារះសំខាន់ណាស់សម្រាប់ការសិក្សា ពីព្រោះយើងជជែកគ្នា ផ្ដល់គំនិតយោបល់ ហើយអាចបងើ្កនចំណេះដឹង កាន់តែច្រើន។ ចំពោះការចូលអានសៀវភៅនៅក្នុងការិយាល័យក៏កាន់តែសំខាន់ដែលអាច ស្រាវជ្រាវ និងយល់ដឹងកាន់តែច្រើន។ មួយទៀតការពឹងអាស្រ័យគ្នាទៅវិញទៅមកក៏ល្អដែរ។ ពេលខ្លះយើងអត់យល់ ឬមិនដឹងត្រង់ចំណុចណាមួយ យើងអានសាកសួរគ្នា្កន។ លើសពីនេះទៀតយើងក៏ត្រូវអានសៀវភៅនៅក្នុងផ្ទះផងដែរ។ ទម្លាប់របស់ខ្ញុំចូលចិត្ដចូលបណ្ណាល័យដើម្បីអានសៀវភៅ បើទោះមិនមានធ្វើកិច្ចការសាលាឱ្យគ្រូក៏ដោយ។
ឡេឌីស័ ៖ អរគុណ ណាស់សម្រាប់ចំណេះដឹងដ៏ល្អនេះ។ និយាយការងារសិល្បវិញម្ដង! ខាងលើកញ្ញានិយាយថា មិត្ដអ្នកអានជិតបាន ឃើញកញ្ញាតាមខ្សែភាពយន្ដហើយ។ តើចំណុចនេះកញ្ញាអានរៀបរាប់បានខ្លះទេ?
សូនីតា ៖ ចាស៎! ខ្ញុំបានចាប់ផ្ដើមថតខ្សែភាពយន្ដហើយ ហើយជាខ្សែភាពយន្ដលើកដំបូងសម្រាប់ខ្ញុំក្នុងនាមជាអ្នកសិល្ប។ ខ្ញុំសម្ដែងជាតួឯកនៅក្នុងខ្សែភាពយន្ដភាគរបស់ស្ថានីយទូរទស្សន៍ ស៊ីធីនដែលមានតួប្រុសជាមួយលោក អ៊ុន សុទ្ធា និងលោកប៉ែន ចំរុង។ ខ្ញុំបានចុះកុងត្រាជាមួយទូរទស្សន៍ស៊ីធីអិនរួចហើយ។ រឿងនេះបានរៀបចំពិធីក្រុងពានីនៅថ្ងៃទី៥ ខែមករា ឆ្នាំ២០១២។
ឡេឌីស័ ៖ សម្រាប់ខ្សែភាពយន្ដលើដំបូងនេះតើកញ្ញាគិតថា ខ្លួននឹងសម្ដែងបានល្អទេ?
សូនីតា ៖ ខ្ញុំមិនទាន់ហ៊ានសន្និដ្ឋានទេពីការទទួលការទទួលបានជោគជ័យឬយ៉ាង ណានោះ ព្រោះនេះជាការសម្ដែងលើកដំបូងរបស់ខ្ញុំ។ ម្យ៉ាងរឿងដែលខ្ញុំសម្ដែងនេះតំរូវឱ្យតួនិយាយសំដីផ្ទាល់ ដូច្នេះការនិយាយផ្ទាល់អាចជាឧបសគ្គសម្រាប់ខ្ញុំដែរ។ ទោះយ៉ាងណាខ្ញុំនឹង ខិតខំព្យាមយាមឱ្យអស់ពីសមត្ថភាពដើម្បីបំពេញតំរូវអ្នកទស្សនា។
ឡេឌីស័ ៖ ចុះបើសិនមានឈុតឆាកស្នេហាជាមួយតួប្រុសបែបធ្វើឱ្យមានក្ដៅសាច់ ណាមួយដូចជា ថើបមាត់ជាដើម តើសូនីតាគិតថាខ្លួនហ៊ានសម្ដែងទេ?
សូនីតា ៖ ខ្ញុំមិនហ៊ានសម្ដែងទេ សម្រាប់ឈុតឆាកស្នោហាដូចជាថើបមាត់គ្នាទេ។ បើសម្រាប់តារាដទៃខ្ញុំមិនដឹងទេ ប៉ុន្ដែសម្រាប់ខ្ញុំគឺមិនអាចទៅរួចទេ។ ពីព្រោះខ្ញុំភ័យខ្លាច និងអៀនខ្មាសណាស់ចំពោះរឿងបែបនេះ។ មុននឹងខ្ញុំទទួលរឿងថតហ្នឹង ខ្ញុំបានសាកសួរហើយនៅក្នុងនេះអត់មានឈុតឆាកស្នេហាហួសហេតុទេ បើមានខ្ញុំអត់ទទួលយកការថតទេ។
ឡេឌីស័ ៖ កន្លងមកឃើញកញ្ញា ម៉ាក សែនសូនីតា និងកញ្ញា ប៊ីរីយាជាពិធីការិនីក្នុងកម្មវិធី Top Teen របស់ ប៉ុស្ដិ៍លេខ៥ ហើយឥឡូវឃើញកញ្ញាធ្វើជាពិធីការិនីក្នុងកម្មវិធីនោះកាលពីថ្ងៃទី ១ខែមករា។ តើនេះជាការធ្វើជាប់ឬជំនួសគេ?
សូនីតា ៖ តាមពិតទៅខ្ញុំទើបតែចាប់ផ្ដើមធ្វើជាពិធីការិនីក្នុងកម្មវិធី Top Teen កាលពីថ្ងៃទីអាទិត្យ ទី១ ខែមករា ឆ្នាំ២០១២នេះ។ ខ្ញុំបាននិយាយជាមួយលោក ចា រិទ្ធី និងអគ្គនាយកទូរទស្សន៍ប៉ុស្ដិ៍លេខ៥រួចហើយ គឺខ្ញុំធ្វើជាពិធីការិនីក្នុងកម្មវិធីនោះជាប់ តែមិនបានចុះកុងត្រាឡើង។ ចំពោះការធ្វើជាពិធីការិនីរបស់កញ្ញាម៉ាក សែនសូនីតា និងប៊ីរីយ៉ាមុននោះខ្ញុំក៏មិនដឹងដែរ។ ទោះយ៉ាង ណាខ្ញុំមានទំនុកចិត្ដ និងជឿជាក់លើខ្លួនឯងជាងការសម្ដែងភាពយន្ដ ពីព្រោះខ្ញុំធ្លាប់ធ្វើជាពិធីការិនីច្រើនលើកមកហើយដែរ។
